နေ့တစ်နေ့ပေါ်က နေ့တစ်နေ့
အဲဒီ့ သံသယ အကြည့်စူးစူးတွေအောက်မှာပဲ
လူလားမြောက်ခဲ့
ဘာဆိုဘာမှ မော့မကြည့်ရဲဘူး
ငုံ့ကြည့်နေတဲ့ မျက်လုံးတွေနဲ့ ခလုတ်တိုက်တယ်
အိပ်မက်တွေ ကြီးမားပြီး လမ်းတွေက ကျဉ်းတယ်
လောကဓံက မာကျောပြီး ဘ၀က ပျော့ညံ့လွန်းတယ်။
တစ်နေ့တစ်နေ့
ဟောင်းနွမ်းနေတဲ့ မျက်နှာကိုပဲ ခဏခဏ ပြန်သစ်ကြ
ပြီး ဒီမျက်နှာတွေအတိုင်း လျှောက်သွားကြ
စားပြီးသား ပန်းကန်တွေ ပြန်ဆေးကြ
ပြီး ပြန်ထည့်စားကြ
အင်္ကျီလုံချည်တွေ အကြိမ်ကြိမ် လျှော်ဖွပ်ကြ
ပြီး၊ပြန်ဝတ်ကြ
တစ်နေ့တစ်နေ့
ဘယ်လို အသက်ရှူရမလဲ
မြို့ကြီး ပြကြီးတွေကလည်း ကာဗွန်စော်နံတယ်
ချစ်ခြင်းမေတ္တာမှာ ငွေကြေးရောစပ်တော့ ပိုပြီး
ညှီစော်နံတယ်
မနက်ဖြန်တွေကလည်း သံသရာစော်နံတယ်။
အလဲလဲအပြိုပြို
အိပ်မက်တွေ ဖရိုဖရဲ လွင့်စင်တုန်း
မနက်ဖြန်ဟာ
နေ့သစ်ဆိုပြီး အယောင်ဆောင်
မျက်နှာပြောင်တိုက် ရောက်လာပြန်ပြီ
ဒီလိုနဲ့
နေ့တစ်နေ့ပေါ် နေ့တစ်နေ့က ခုန်အုပ်သွားခဲ့။ ။
မွန်းအိမ်
မဟေသီ၊ဖေဖော်ဝါရီ၊၂၀၀၁၊စာ-၁၄
Subscribe to:
Post Comments (Atom)
No comments:
Post a Comment