Saturday, April 3, 2010

သင်္ဘောပျက်များ

သင်္ဘောပျက်များ

ပင်လယ်က ဘယ်လောက်ပဲတေးဆိုဆို
သင်္ဘောပျက်တွေကတော့ နိုးထလိမ့်မည်မဟုတ်
ပင်လယ်အောက်မှာ သင်္ဘောပျက်တွေ ပူနွေးစွာအိပ်ပျော်နေကြ
မနှိုးလိုက်ပါနဲ့တော့။အသံမပြုလိုက်ပါနဲ့တော့…
သင်္ဘောပျက်တွေလို ဟောင်းနွမ်းတိမ်မြုပ်နေတဲ့ ငါ့နှလုံးသားကို
တစ်စုံတစ်ရာသော မျှော်လင့်ချက်ဥသြသံတွေနဲ့ မဆွဲတင်လိုက်ပါနဲ့တော့
မာလိန်မှူးဟောင်းတွေက ကမ်းခြေမှာ အရက်သောက်ပြီး
သူတို့မောင်းနှင်ခဲ့တဲ့ သင်္ဘောတွေကို သတိရနေသလိုမျိုး။ ငါ့ကို သတိမရသင့်တော့
သင်္ဘောပျက် အစုအဝေးကြီးဘယ်တော့မှ ရေပြင်ထက် တက်မလာတော့သလို
ကြေကွဲမှုတွေက နှစ်များစွာအောက်ခြေမှာပဲ ဆိတ်သုဉ်းနေထိုင်ကြ
နေရောင်အောက်မှာ ပင်လယ်ဟာ တလက်လက်တောက်ပနေပေမယ့်
ငါ့အတွေးမှတ်ဥာဏ်ထဲမှာတော့ နက်ရှိုင်းငြိမ်သက်လို့သာနေပေရဲ့
သင်္ဘောပျက်တွေရဲ့ မျက်လုံးတွေ ဘယ်တော့မှ ပွင့်မလာတော့သလို
ငါ့မျက်လုံးကို ဘယ်တော့မှဖွင့်ပြီး မောင်းနှင်လာတော့မှာမဟုတ်
သင်္ဘောပျက်ထဲမှာ အရိုးစုနဲ့ ရတနာသေတ္တာတွေရှိနိုင်သလို
အထီးကျန်မှုနဲ့ ငါ့အတိတ်ဟာ မည်းမှောင်အေးစက်မှုထဲမှာ ပေါလောမျောနေတယ်
မာလိန်မှူးဟောင်းတွေရဲ့ ဆေးတံထဲက မီးခိုးငွေ့တွေထွက်နေပုံက
သူတို့ကိုယ်တိုင်က သင်္ဘောတွေလိုလို
သင်္ဘောတစ်စင်းထဲ လေ့လာနေသလိုလို
သင်္ဘောပျက်တွေရဲ့ ထာဝရတင်းမာနေတဲ့ ချေးညှိတက်သံလက်ကိုင်တွေဆီ
သူတို့လက်တွေ ရောက်မလာတော့
ထာဝရဝေးကွာသွားတဲ့ ချစ်သူတွေလို
သင်္ဘောပျက်တွေရဲ့ မီးခိုးခေါင်းတိုင်ဆီက စကားသံကြားရတော့မှာမဟုတ်။ ။

ပိုင်
၁.၉.၂၀၀၁
(အိုင်ဒီယာ၊ဇန်န၀ါရီ၊၂၀၀၃)

No comments:

Post a Comment