Thursday, May 20, 2010

ကမီးကလော်ဒဲလ်အတွက်တေး

ကမီးကလော်ဒဲလ်အတွက်တေး

ရွှံ့စေးမဟုတ်ဘူး
အဲဒါထက် သိမ်မွေ့တဲ့ထောင့်တစ်ခုကနေ
ပြူထွက်လာတဲ့အနမ်း
ခုတော့
ရေခဲထဲမှာ လောင်ကျွမ်းလို့။

ကြောက်မက်ဖွယ်နေ့များရဲ့ နံရံထဲ
မီးစာဟာ သန်းခေါင်ယံကို စုပ်မျိုလို့
ရုပ်တုက အသက်ဝင်နေတဲ့ အရိပ်မှာတော့
မျက်ဝန်းပြာဟာ မျက်ရည်ကို မမြင်ရဘူး။

သွေးစိမ်းရှင်ရှင်ထွက်နေတဲ့ ရေတံခွန်အောက်
နှလုံးသားဟာ ကျောက်တုံးလို အနာတရနဲ့
ဆွံ့အ၊

မြို့ရဲ့ မျှော်စင်ထက် လေးလံမြင့်မားပြီး
မြို့ရဲ့ လမ်းတွေထက် ရှည်လျားခဲ့တဲ့
သုညရဲ့ ဆူးပြွန်းဝင်္ကပါဆီ
ဘုရားသခင်ဟာလည်း မှုန်ဝါးလို့။

ပေါင်မုန့်ဖုတ်နည်းစာအုပ်လို
ဖတ်ပြီး ပိတ်လိုက်ရမယ့် လွယ်လွယ်ဘ၀မဟုတ်ဘူး
ဒါပေမယ့်
ကြယ်ကို မြေကြီးထဲ ထိုးထည့်လိုက်ကြတယ်
မရဘူး
အဆုံးမှာတော့
ကြယ်ဆိုတာ မိုးကောင်းကင်ရဲ့ အရေးအရာလို့
ငါတို့ သိခဲ့ကြရပေါ့။ ။


စံငြိမ်းဦး

မှတ်ချက်။ ။ကမီးကလော်ဒဲလ်(Camille Claudel)ကို ၁၈၆၄ မှာ မွေးတာ။ပန်းပုဆရာရိုဒင်ရဲ့
၁၅ နှစ်ကြာတွခဲ့တဲ့ ရည်းစား။ပြီး စွန်ပစ်ခံ၊အရူးထောင်မှာ ၂၅ နှစ်နီးပါး အရူးအဖြစ်
ဘ၀ကို ကုန်ဆုံးရ၊ ပြင်သစ်ပန်းပုပညာရှင်။

မြားနတ်မောင်၊ဒီဇင်ဘာ၊၂၀၀၁၊စာ-၁၄

No comments:

Post a Comment