Friday, May 28, 2010

ဟိုကောင်ကြီး

ဟိုကောင်ကြီး

မင်းနဲ့ ငါနဲ့ ကြားမှာ လုပ်ထုံးလုပ်နည်းတွေ ကွဲပြားတယ်
မင်းက ငါ့ထက်စာရင် တွန့်ဆုတ်လွန်းတယ် စဉ်းစားလွန်းတယ်
ကိစ္စတော်တော်များများမှာ အမှားနည်းတယ် ငါက အရာရာထိပ်တိုက်တွေ့လိုက်ရမှ
ပျော်ရွှင်တတ်တဲ့ကောင် ဘ၀ကို စစ်တုရင်ရွေ့သလို မင်းအရမ်းသတိထား ကစားတယ်
ငါ့အတွက်က ဘ၀ဆိုတာ အံစာတုံးကို မြန်မြန်ပစ်ကြဲ မိုနိုပိုလီကစားနည်းပဲ မင်းနဲ့ငါ စကား
နိုင်လုပြီဆိုရင် ထထထွက်သွားတတ်တဲ့ ဟိုကောင်ကြီးကျတော့ ပုံစံတစ်မျိုး မင်းနဲ့ငါ သဘော
ထားကွဲလွဲတဲ့အခါ ဟိုကောင်ကြီးရဲ့ အဆုံးအဖြတ်ဟာအရေးကြီးတယ် ငါက ဘာမဆို အမှား
များတယ် တဒိုင်းဒိုင်းကန်သွင်းတတ်တယ် မင်းလို အစာကြေအောင်မစောင့်တတ်ဘူး အချိန်
အဆမရှိဘူး တစ်ခါတစ်လေ ဟိုကောင်ကြီးလည်း ငါ့လိုအချိန်အဆမရှိပြန်ဘူး မင်းအတွေး
အခေါ်တွေက လေးလံနက်နဲတယ် ငါလိုက်လို့မမှီဘူး မင်းပုံစံက ကြည့်လိုက်တိုင်း ဂေါ့ဖားသား
ထဲက အယ်လ်ပါစီနိုပဲ တစ်ခုခုကို စိတ်ရှည်လက်ရှည်စောင့်လို့ ဒါမျိုးအိုက်တင် ဟိုကောင်ကြီး
လည်း လုပ်တတ်တယ် မင်း ထူးထူးဆန်းဆန်းတွေပြောတဲ့အခါ ငါနားမလည်ပေမယ့်
ဟိုကောင်ကြီးက နားလည်တယ်
ဒီလိုပဲ ငါကစားတဲ့ ဘောလုံးပွဲတွေ မင်းမလိုက်လည်း ဟိုကောင်ကြီးက လိုက်တာပဲ
ဒါပေမယ့် မင်းနဲ့ ငါရဲ့ တစ်ဖက်ဖက်မှာ အမြဲတမ်းတော့ ဟိုကောင်ကြီးမရပ်ဘူး ငါ့ဖက်ပါလိုက်
မင်းဖက်ရောက်လိုက်နဲ့ ကျောင်းတုန်းက မင်းဝါသနာဟာ ဥယျဉ်မှူး ငါစိတ်ပါတာက
ဘောလုံးသမား ဟိုကောင်ကြီးကိုတော့ ဒီကိစ္စမေးလို့မရဘူး အသံတိတ်တယ်
ခုတော့ မင်းအလုပ်က စာရေးဆရာ ငါ့အလုပ်က ကားပွဲစား
ဟိုကောင်ကြီးကတော့ သူဌေးသမီးနဲ့ ညားသွားတယ်။ ။

လွန်းဆက်နိုးမြတ်
ပိတောက်ပွင့်သစ်၊အောက်တိုဘာ၊၂၀၀၉၊စာ-၈၈
(ဒီကဗျာကို ပိတောက်ပွင့်သစ်မှာ ဖော်ပြခံရတော့ “မင်းအရမ်းသတိထား ကစားတယ်”ဆိုတဲ့ စာကြောင်းက စာစီရိုက်မှားနေပြီး“မင်းအရျွ်းသတိထားကစားတယ်”ဖြစ်သွားပြီး“မင်းနဲ့ငါ သဘောထားကွဲလွဲတဲ့အခါ ဟိုကောင်ကြီးရဲ့ အဆုံးအဖြတ်ဟာအရေးကြီးတယ် ငါက ဘာမဆို အမှားများတယ် ”ဆိုတဲ့ စာကြောင်းကတော့ လုံးလုံးပါရှိမလာတော့ဘဲ “မင်းနဲ့ငါ ဘာမဆို အမှားများတယ်”လို့ လွဲမှားသွားခဲ့ပါတယ်။(ဒီအတွက် ဆရာ မောင်စိမ်းနီကို ပြောပြရာမှာတော့ ဆရာမောင်စိမ်းနီက လိုလိုလားလား အပြုသဘော လက်ခံပေးလို့ကျေးဇူးတင်ရပါတယ်)အခုတော့ ကျွန်တော် အပြည့်အစုံရေးထားပါတယ်။ အရသာမပျက်တော့ဘူးပေါ့ခင်ဗျာ)

No comments:

Post a Comment