ထွက်ပြေးတဲ့အခါ
ထွက်ပြေးတဲ့အခါ
ပိတ်ဆို့လမ်းတွေကျယ်ပြော
သဲဆူးတောတွေ ဖြတ်နင်းရင်း
ဟင်းလင်းပွင့်ရင်ကတောင် လေးလံရဲ့။
ထွက်ပြေးတဲ့အခါ
မျက်လုံးများစွာကြား
ပြားပြားဝပ်အကျဉ်းကျ
ပါးစပ်ပေါက်တွေက ကာဆီးတောင်တန်း
ကျရတဲ့ မျက်ရည်တွေက ပင်လယ်။
ထွက်ပြေးတဲ့အခါ
နာကျင်ခြင်းမြွေတွေက
ခန္ဓာကို လိမ်ပတ်
ညှစ်သတ်တော့
ခပ်လျော့လျော့အသက်က
မျက်လုံးပြူး မျက်ဆံပြူးနဲ့ ရုန်းထ
သူ့ဘ၀ကို ပိုရုပ်ကြွလာစေပြန်တယ်။
ထွက်ပြေးတဲ့အခါ
အရိပ်တွေက
နဂိုထက်မြန်မြန်ပိုလိုက်
ဒါနဲ့ပဲ
မိုက်မဲတဲ့အသည်းက
မေ့ထားသမျှကို ပိုပိုသတိရ
အဲဒီအခါ…
“နင်ဟာ အနာတရနဲ့သာ ထိုက်တန်တဲ့ကောင်“လို့
ကိုယ့်ကိုကိုယ်ဆဲရေးရ
တကယ်တမ်းကျ
“ထွက်ပြေး“ရတာကိုက
“ထွက်ပြေးမရ“တာ။ ။
မေငြိမ်း
(ရာစုသစ်မြစ်ကျဉ်း၊အမှတ်-၄၊စာ-၅)
Subscribe to:
Post Comments (Atom)
No comments:
Post a Comment